Sa kanyang liham ng pagbibitiw, ipinahayag ni Herbosa na isang malaking karangalan ang makapaglingkod bilang ika-30 Kalihim ng Kalusugan ng bansa. Aniya, “In full support of the ongoing performance review of all Cabinet members and government agencies, I respectfully offer my courtesy resignation.” Dagdag pa niya, mananatili siyang tagasuporta ng administrasyon sa pagtupad ng layuning mailapit ang serbisyong pangkalusugan sa bawat Pilipino.
Si Herbosa ay nanunungkulan bilang Kalihim ng DOH mula Hunyo 2023. Bago ito, nagsilbi siyang undersecretary ng ahensya mula 2010 hanggang 2015 at naging espesyal na tagapayo ng National Task Force Against COVID-19. Kamakailan lamang, siya ay nahalal bilang pangulo ng ika-78 sesyon ng World Health Assembly, na kauna-unahang pagkakataon para sa isang Pilipino na gumanap sa naturang posisyon.
Ang kanyang pagbibitiw ay bahagi ng mas malawak na hakbang ng Pangulo na muling ayusin ang gabinete upang mas epektibong matugunan ang mga hamon at inaasahan ng publiko, lalo na matapos ang midterm elections. Ayon kay Pangulong Marcos, ang panawagan para sa courtesy resignation ay hindi tungkol sa personalidad kundi sa pagganap, pagkakahanay, at kagyat na aksyon.
0 Comments