45.6 Kilo ng Shabu, Natagpuan ng mga Mangingisda sa Cagayan

 Dalawang mangingisda mula sa Claveria, Cagayan ang nakatuklas ng tinatayang 45.6 kilo ng hinihinalang shabu na palutang-lutang sa karagatan malapit sa Barangay Centro 6 nitong Linggo, ayon sa ulat ng Philippine Drug Enforcement Agency (PDEA) noong Lunes.

Ayon sa PDEA Region 2, ang ilegal na droga ay nakabalot sa kahon at mga plastic na may Chinese markings, indikasyong posibleng mula ito sa international drug syndicates. Agad itong isinuko ng mga mangingisda sa pulisya at dinala sa tanggapan ng PDEA para sa imbestigasyon.

Mahigit ₱310 milyon ang tinatayang street value ng nasabing droga. Pinuri ng mga awtoridad ang pagiging tapat ng dalawang mangingisda sa kabila ng panganib at tukso. “Isang magandang halimbawa ito ng kooperasyon ng mamamayan sa kampanya kontra droga,” ani PDEA Director General Moro Virgilio Lazo.

Patuloy na isinasagawa ang coordination sa Philippine National Police (PNP), Maritime Police, at Coast Guard upang alamin kung paano napunta sa dagat ang mga pakete. Isa sa mga posibilidad ay pagbagsak mula sa lumalayag na barko o sadyang itinapon para sa retrieval ng ibang grupo.

Nagbabala rin ang mga awtoridad na maaaring lumawak pa ang drug smuggling routes sa Northern Luzon kaya pinaigting ang maritime patrols at intelligence operations sa mga baybayin ng Cagayan Valley at mga karatig-lalawigan.